Янгында бер кешенең гомере өзелде

Агымдагы елның 16 гыйнварында 9 сәгать 4 минутта «Глонасс+112» системасы буенча Башчыда йорт януы турында хәбәр керә. 133 янгын-коткару бүлеге хезмәткәрләре хәбәр буенча шунда ук кузгала. Урында бер катлы ике фатирлы торак йорт янганлыгы ачыклана. 

Янгын сүндерелгәннән соң, фатирларның берсендә 1956 елда туган йорт хуҗасының гәүдәсе табыла. 

— Авыл халкы мәгълүматлары буенча, ир-ат берүзе яшәгән, алкогольле эчемлекләр кулланган, өйдә тәмәке тарткан. Вафат булучының аяклары белән проблемалары була, шуңа күрә ул йорт эчендә генә йөри, беркая да чыкмый, кирәкле азык-төлекне авылдашлары китерә. Элегрәк ир-ат быел гыйнвар башында вафат булган әтисе белән яшәгән, — дип хәбәр итте ТРның Кама Тамагы һәм Тәтеш районнары буенча күзәтчелек эшчәнлеге һәм профилактик эшләр районара бүлеге хезмәткәрләре. — Янгын нәтиҗәсендә ике фатирлы торак йорт янып бетте. Тиз кабынучан яки янучан сыеклык эзләре табылмады. Янгынның сәбәбе — тәмәке тартканда ут белән саксыз эш итү. Зыян билгеләнә.