Җылылык һәм су белән тәэмин итәләр

“Тәтеш-Су каналы” һәм “Тәтеш җылылык челтәрләре предприятиесе”нең узган ел йомгаклары һәм киләчәккә планнары турында аларның җитәкчесе Руслан Полозов сөйләде.

– Руслан Николаевич, узган елда оешмалар эшчәнлегенең нинди төп күрсәткечләренә ирешелде?

– 2025 ел дәвамында без Тәтеш шәһәрен су белән тәэмин итүне тотрыклы рәвештә сыйфатлы итеп башкардык. Барлыгы 575 мең кубометр су бирелде, шуның 338 мең кубометры акчага әйләндерелде. Сатуның гомуми күләменең күп өлеше халыкка туры килә – якынча 290 мең кубометр. Моның белән беррәттән шунысын да билгеләп үтәм, суны югалту проценты югары, бу мәсьәлә бүгенге көндә дә проблема булып кала, без аны чишү өстендә актив эшлибез.
Җылылык челтәрләренә килгәндә, узган елда без якынча 19 мең гигакалория җы­­­лылык энергиясе эшләп чы­гардык, шуның якынча 17 мең гигакалориясен кулланучылар алды. Чыгымнарның төп өле­шен табигый газ өчен тү­ләүләр тәшкил итте, бу барлык чыгымнарның якынча өчтән бер өлеше.

– Предприятиеләрегезнең чыгымнар структурасы һәм финанс торышы турында сөйләгезче.

– Төп чыгымнар электр энер­гиясе, хезмәткәрләрнең хезмәт хакы фонды һәм иминият взнос­лары белән бәйле. Мәсә­лән, электр энергиясенең бәясе – 8 миллион сумны, хезмәт хакы фонды – 13,8 миллион сумны, иминият взнослары 4,2 миллион сумны тәшкил итте. Бу чыгымнардан тыш, зур суммалар башка чыгымнарга, шул исәптән җайланмаларга техник хезмәт күрсәтүгә һәм материалларны алыштыруга тотыла.

Финанс торышына килгәндә, 2026 ел башына дебиторлык бурычы 7,8 миллион сумга җитә, бурычларның күп өлеше – гомуми сумманың яртысы диярлек – халыкка туры килә.
Безнең предприятие 42 ко­тельныйдан торган челтәргә ия, җылылык трассаларының гомуми озынлыгы 3,5 чакрымны тәшкил итә. Җылылык чел­тәрләренең якынча 20 проценты искергән дип табылды һәм аларны алыштыру таләп ите­лә. Шулай ук котельный би­наларының һәм резерв ягулык хуҗалыгының торышы бе­лән бәйле җитди проблемалар бар, алар капиталь ремонтка яки яңартып төзекләндерүгә мохтаҗ. Ни аяныч, финанс­лау җитмәү әлеге мәсьәләләр­не үз вакытында хәл итүне катлауландыра.

– 2025 елда сез нинди төп инфраструктура проектларын гамәлгә ашырдыгыз?

– Узган елда безгә су ка­налы буенча инфраструктура объектларын яңарту һәм тө­зекләндерү буенча берничә мөһим чараны башкарырга мөмкин булды. Иң әһәмиятле проектлар арасында: берен­че күтәрелештәге насос стан­цияләренең һәм 4 скважи­наның түбәсен алыштыру, су­үткәргеч һәм канализация челтәрләрен яңарту, канали­зация система­сының күп өлешен юдырту һәм чистарту, биш коега яңа насослар урнаштыру.

Җылылык челтәрләре пред­приятиесе продукциясенең барлык күләме диярлек бюджет учреждениеләре ихтыяҗларына юнәлтелде, аларның өлеше 95 процентка җитә. Калган энергия халык һәм башка кулланучылар арасында бүленә.

– Агымдагы елга план­на­рыгыз белән уртакла­шыгызчы.

– Безнең бурычлар: ад­ми­нистратив бинаның түбәсен төзекләндерү, алты коеда на­сослар алыштыруны дәвам итү, шәхси секторны Калинин урамындагы яңа трассага тоташ­тыру, Ленин урамы буенча 800 метр озынлыктагы тузган канализация челтәрләрен алыштыру, канализация чел­тәрләрен махсус машина белән юдырту һәм чистарту, шәһәрдәге җимереклек торы­шындагы коеларда 40 данәдә капкач һәм люкны алыштыру.

Җылылык челтәрләре бу­енча безнең алда җайлан­маларны яңартып төзек­ләндерү һәм әҗәтләрнең күләмен киметү кебек мөһим бурычлар тора. Без үткәр­геч торбаларның иске учас­токларын алыштыруны дәвам итәчәкбез, энергия нәти­җәлелеге технологияләрен кер­тәчәкбез һәм җылы­лык белән тәэмин итүнең ыша­­ныч­лыгын арттыру өчен өстәмә финанс­лау чы­ганак­лары эзләячәкбез. Про­изводство куәтен яңартып төзекләндерүгә инвестиция­ләр җәлеп итү өчен хакимият органнары һәм инвесторлар белән актив хезмәттәшлек итәргә планлаштырабыз.

– Әңгәмәгез өчен рәхмәт.

фото: Тәтеш муниципаль районы сайты