Шәһәрдә “Тәтеш районында умартачылыкны үстерү перспективалары һәм аларның проблемалары” дигән киңәшмә булды

Тәтештә район башлыгы урынбасары Евгений Курков катнашында “Тәтеш районында умартачылыкны үстерү перспективалары һәм аларның проблемалары” дигән киңәшмә булды.

Районның авыл хуҗалыгы һәм азык-төлек идарәсе начальнигы Ирек Садриев кооператив булдыру хисабына умартачылык продукциясен җитештерүне арттыру перспективалары һәм проблемалары турында сөйләде, районның ветеринария оешмасы начальнигы Рәмис Гарипов киңәшмәдә катнашучыларны умарталарны тоту, исәпкә алу һәм пас­портлаштыру буенча ветеринария кагыйдәләре белән таныштырды, Россельхозцентр начальнигы Радик Закиров җитәкчеләргә үсемлекләрне корткычлардан, чүп үләннәреннән һәм авырулардан саклау буенча эшләр уздыруны умартачыларга хәбәр итү мөһимлеге турында искә төшерде.

Монастырскийда яшәүче умартачы Аркадий Приказчиков Варроа талпанына каршы көрәшү өчен бал кортларын термоэшкәртү вакытында термокамера белән эшләү алымнары турында сөйләде. Умартачы Артур Файзулоев җыелучыларны басуларны эшкәрткәндә бал кортларын саклау буенча күрелә торган чаралар белән таныштырды.