Тукай иҗаты – халыкара хәзинә

Шигърият кичәсе Тәтештәге ­балалар сәнгать мәктәбендә Тәтеш районының “Ак калфак”, ­“Татар гаиләсе” ­иҗтимагый ­оешмалары җитәкчесе, “Ха­­тын-кызларның интер­на­циональ берлеге” ТИО вице-президенты Рима Сафиуллованың һәм район башкарма комитеты җитәкчесе урынбасары Наталья Николаеваның  сәламләү сүзләреннән  башланып китте.  

Рима Гомәр кызы Тукай иҗатының мәңгелек икәнен, үзеннән соң килгән буыннарга илһам чыганагы булып торуын билге­ләп үтеп, туган телебезне, әдәбиятыбызны үстерүгә лаеклы өлеш керткән һәр­кемгә җылы теләкләрен ирештерде.

Бәйрәмдә Тәтештәге  1нче, 2нче һәм татар урта мәктәпләре, кадет мәктәп-интернаты, Алабирде, Бидәңге, Бакырчы, Олы Тархан, Зур Әтрәч, Монастырский, Нармонка мәктәпләре укучылары, шәһәрдәге “Миләшкәй”, “Әкият”, Келәш авылының “Кояшкай” балалар бакчалары сабыйлары,  мә­дәният хезмәткәрләре,  китапханәчеләр, җирле шагыйрьләр, Тукайга багышлап шигырь иҗат итүчеләр чыгыш ясады. 

– Яз һәм Тукай аерылгысыз төшенчәләр, шуңа күрә без һәр елны Тукай туган көнен көтеп алабыз. Бөек әдибебезнең иҗа­тына мәхәббәт кече яшь­тән үк башлана.

Аның шигырьләрен балалар бакчалары сабыйлары да, башлангыч һәм өлкән сыйныф укучылары да бик теләп өйрәнәләр, тормыш юлы, иҗаты белән кызыксыналар. Бәйгедә катнашучылар исәбе елдан-ел арта бара, – диде жюри вәкиле Асия Ибраһимова.

Тукай әсәрләре буенча район күләмендә бәйге игълан ителгәч, рәсем, кул эшләре бәйге­сендә дә катнашучылар шактый булды. Чын рәс­сам­нарча зәвык белән ясалган рәсемнәрдән, бер­сеннән-берсе матур һәм үзенчәлекле итеп эшләнгән төрледән-төрле сыннардан күргәзмә бизәлгән иде. 

Иҗат кичәсендә Тукай ши­гырь­ләре татар, рус, чуваш,  мордва телләрендә яңгырады. 

Театраль­ләш­тереп сөй­ләнгән “Бала бе­лән Күбәләк”, “Фатыйма белән Сандугач”, “Яңгыр һәм Кояш”, “Тукай  иртәсе” “Шүрәле” һәм башка әсәрләр, бөек Тукай шигырьләренә язылган җырлар чарага үзенчәлек һәм ямь өстәде. Кыскасы, Тукай иҗаты әдәпкә, тәртипкә, намуслы булырга өйрәтә. 

Шигырь бәйрәмендә Тукайга багышлап үзләре язган шигырьләрне сөй­ләүчеләр дә булды. Бу да үзенә бер төрле соклану уятты. Һәр чыгышны тамашачылар көч­ле алкышларга күмде. 

Ахырдан Рима Сафиуллова VIII Бөтенроссия “Ак калфак” укучы кызлар һәм егетләр бәйгесе финалы­на чыккан районыбыз укучыларын һәм аларны әзерләгән педагог­ларны дипломнар, акчалата сертификатлар белән бүләкләде.

Шулай ук шигырь бәй­рәменә әве­­релгән чара барлык уку­чыларга да дип­ломнар тапшыру, “Туган тел” җы­рын башкару белән ­тәмам­ланды. 

Туган телебезнең байлыгы, матурлыгы бәй­рәм­нәрдә аеруча да нык тоела.
видео: Сания Самигуллина