Тәтеш районында Россия көнен һәм Сабантуйны бәйрәм иттеләр

(Тәтеш, 16 июнь, "Тәтеш таннары"). Сабантуй бер үк вакытта борынгы һәм яңа бәйрәм, анда татар халкының матур гореф-гадәтләре, аның җырлары, биюләре, йолалары бергә кушыла.

Бәйрәм Россия Федерациясе һәм Татарстан Республикасы гимннарыннан башланды.
 Беренчеләрдән булып район халкын һәм кунакларны Тәтеш районы башлыгы Рәмис Сафиуллов сәламләде.

– Бүген без бер үк вакытта ике бәйрәмне: илебезнең төп дәүләт бәйрәме – Россия көнен һәм халык бәйрәме – Сабантуйны билгеләп үтәбез! Илебезнең туган көнендә зур йортыбызның тарихы һәм мәдәнияте өчен аерым горурлык кичерәбез. Бу истәлекле көндә безнең районда Сабантуй – дуслык һәм хезмәт бәйрәме билгеләп үтелә, анда без язгы кыр батырларын һәм районның авыл хуҗалыгы производствосы алдынгыларын хөрмәтлибез, – диде Рәмис Хатыйп улы һәм район халкы исеменнән Тәтеш районында дәүләт программаларын гамәлгә ашыруда ярдәм итүләре өчен Татарстан Президентына, Хөкүмәт, Дәүләт Советы, муниципаль берәмлекләр Советына рәхмәт ­белдерде.

Аннары бәйрәмдә катнашучыларга “Татарстан Республикасы муниципаль берәмлекләре Советы” Ассоциациясе рәисе Әгъзам Гобәйдуллин мөрәҗәгать итте.  
– Россия көне – бердәмлек һәм тынычлык бәй­рәме белән. Үткәнне, хәзергене һәм киләчәкне символлаштыручы Сабантуй бәйрәме белән. Бүген Тәтеш районы авыл хуҗалыгы һәм агросәнәгать комплексында яңа технологияләр куллану буенча күпләргә үрнәк булып тора, – диде Әгъзам Самат улы һәм рес­публикабыз Президенты Рөстәм Миңнехановның безнең район халкына сәламәтлек, бәхет һәм иминлек теләп мөрәҗәгать иткән котлавын укыды.

Сабантуй-2021 әләмен күтәрү хокукы “Колос” агрофирмасыннан язгы чәчү батыры – 2021 Алексей Борисовка һәм Сабантуй-2019ның абсолют батыры Илназ Шәмсетдиновка бирелде.

Бәйрәм Тәтеш районының язгы чәчү батырлары һәм алдынгы хуҗалык җитәкчеләренең тантаналы йөрешеннән башланды. Парадны язгы кыр эшләрен оптималь агротехник срокларда тәмамлаучы һәм иң югары балл җыючы район авыл хуҗалыгы предприятиеләре, терлекләрне кышлатуны иң югары продуктивлык белән уңышлы тәмамлаган “Колос” агрофирмасы, “Бакырчы” авыл хуҗалыгы предприятиесе, “Нур” агрофирмасы ачты. Сабан культураларын чәчүдә иң югары күрсәткечләргә ирешкән механизаторлар Борисов Алексей Васильевич (“Колос” агрофирмасы), Аввакумов Сергей Геннадьевич (“Содружество” авыл хуҗалыгы предприятиесе) һәм Галиәкбәров Ришат Рәмис улы (“Бакырчы” авыл хуҗалыгы предприятиесе) язгы чәчү батырлары (Тәтеш районы башлыгының Рәхмәт хаты һәм премияләре белән бүләкләнделәр) дип танылды. Югары җитештерү күрсәт­кечләренә ирешкән өчен район агросәнәгать комплексының 75 хезмәткәре  Тәтеш рай­оны башлыгы Рәхмәте, акчалата премияләр белән  бүләкләнде. Авыл хуҗалыгында күпьеллык хезмәте өчен 17 хезмәт  ветераны Тәтеш районы башлыгының Рәхмәт хаты һәм кыйммәтле бүләкләр белән бүләкләнде.

Россия көнендә, илнең һәр граж­данинының төп докумен­ты – Россия паспорты  – тантаналы рәвештә ике яшь тәтешлегә тапшырылды. 
Игенчеләрнең хезмәтен мак­тап җырлаучы театраль­ләштерел­гән тамашада районы­бызның үзешчән сәнгать коллективлары катнашты. Бәй­рәмдә катнашучыларны эчтә­лекле чыгышлар, матур җырлар, төрле халык биюләре, артистларыбызның матур милли киемнәре әсир итте. Сабан туенда рус, татар, чуваш, мордва халыкларының бәйрәмчә ясалган йорт-җирләрендә милли  ризыклар тәкъдим ителде. Районның авыл хуҗалыгы предприятиеләре агросәнәгать комплексында казанышлар күргәзмәсе оештырганнар. Балалар махсус оештырылган мәйданчыкларда милли күңел ачуларда, мастер-классларда, конкурсларда актив катнаштылар. Аерым мәйданчыкта концерт прог­раммасы оештырылган, ул район мәдәният учреждениеләре хезмәткәрләре арасында иң яхшы концерт номерларын үз эченә алды. Ир-атлар спорт ярыш­ларында көч һәм рух күтәренкелеге күрсәттеләр.  Спорт сөючеләр көрәш ярышларына җыелды, аның нәтиҗәләре буенча, Үтәмеш авылыннан Илназ Шәмсетдинов – Сабантуйның абсолют батыры (бүләккә тәкә алды), Кызыл Тарханнан Ислам Сәйтморатов яшь батыр булды. 

Аркан тартышу, капчык белән сугышу, капчык киеп йөгерү, чаңгыда узышу, колгага менү һәм яңа бәйге – автомобильне 10 метрга кадәр тизлеккә тартып бару (1нче урынны Виталий Анисимов (12 секунд), икенче урынны Дарья Антонова, Людмила Артемьева һәм Ильмир Сафиуллов (13әр секунд)  бүлеште,  өченче урынны Владислав Макаров (14 секунд) алды). Теләгән кеше кул көрәше буенча көч сынашты, волейбол, мини-футбол, шашка һәм шахмат уйнады, ГТО нормаларын тапшырды. Барлык ярышларда җиңүчеләргә истәлекле бүләкләр тапшырылды.

Бәйрәмнең аеруча истәлекле мизгеле – ат чабышы, 4 төрле узышта Сергей Саблин (“Р. Г. Сафиуллова” КФХ), Валерий Федотов (“Нур” агрофирмасы), Гордей Нестеров (“Р. Г. Сафиуллова” КФХ), Владимир Михайлов (“Колос” авыл хуҗалыгы предприятиесе) җиңү яулады. Шуны билгеләп үтәргә кирәк, әлеге төр ярышларның иганәчесе эшмәкәр Рамил ­Гафуров булды.

Сабантуйның киң программасын безнең район администрациясе, мәгариф оешмалары, мәдәният һәм спорт учреждениеләре оештырды. Бәйрәм вакытында полиция, МЧС һәм Тәтеш ҮРХ хезмәткәрләре куркынычсызлыкны тәэмин иттеләр. 

– Кәеф искиткеч, бәйрәм бик яхшы оештырылган. Тәтешкә Сабантуйга дип махсус килгән туганнарыбыз белән бирегә килдем. Безгә бик ошады,  – дип уртаклашты шәһәр кешесе Татьяна.
Сабан туе шулай ук рай­онның күп кенә авылларында, авыл хуҗалыгы пред­приятиеләре коллективларында узды. 

Район Сабан туе алдыннан Башчы авылында “Колос” агрофирмасы һәм “Р. Г. Сафиуллова” КФХ авыл Сабан туен үткәрделәр, анда кунакларга бик зур прог­рамма тәкъдим ителде: алдынгыларны бүләкләү, Ульяновски өлкәсе һәм районыбыз мәдәният хезмәткәрләре катнашында концерт программасы, аттракционнар, спорт ярышлары, милли көрәш, ат чабышы һәм салют. 

Сабантуй күңелле үтте, чираттагы тапкыр Тәтеш районы халкының хезмәт сөючәнлеген, дуслыгын һәм татулыгын күрсәтте.