Раиса Ерусланова: “Аларга башмаклар бәйлим!”

(Тәтеш, 18 апрель, “Тәтеш таңнары”, Мәдинә Ибәтуллина). 

– Без Раиса Алексеевна белән ике ай элек очрашкан идек, сөйләшкәндә ул миннән ничә кешенең социаль хезмәт алуы хакында сорады. “Илле”, – дип җавап бирдем мин. “Аларга башмаклар бәйлим!” – диде Раиса Алексеевна. Шушы араларда ул шалтыратты һәм безнең йортта яшәүчеләрнең һәркайсы өчен җылы бүләк әзер булуын хәбәр итте.  Бик матур, уңайлы башмаклар бәйләгән, – дип тәэсирләнеп сөйләде интернат-йортның директоры Людмила Самаркина.

Раиса Ерусланова кул эше белән лаеклы ялга чыккач шөгыльләнә башлаган. 
– Элек үземне тулысынча хезмәткә һәм гаиләгә багышладым. Ә пенсиядә булганда буш вакыт барлыкка килде. Эскәтерләр, кофталар бәйләдем, барысын да туганнарымның балаларына өләштем, әле тагын бер кофта бүләк ителмәгән килеш тора, – дип көлә тәтешле. – Җәй айларында яшелчә белән шөгыльләнәм, салкыннар башлануга бәйләүгә тотынам. Бәйләгән әйберләр модадан чыкмый.   

Өлкән яшьтәге кешеләр көтелмәгән күчтәнәчкә бик сөенгәннәр. Алар кул эшләре остасына игелек­леге һәм игътибарлыгы өчен чын йөрәктән рәхмәт белдергәннәр, чөнки һәр башмак – аның күңел һәм кул җылысын кушып бәйләнгән. 
фотоны Людмила Самаркина тәкъдим итте