Бүген – Бөтендөнья куллар чисталыгы көне

– Куллар чирләү сәбәп­чесе булган микроор­ганизмнарның күчүенә төп фактор булып тора, шуңа күрә кулларны сабын белән даими юу куркыныч чирләрдән сак­ларга ярдәм итә, – дип киңәш бирә Тәтеш үзәк район хастаханәсе табибы Галина Горланова. – Кулларның чисталыгы эчәк инфекцияләре таралуны һәм сулыш инфекцияләрен йоктыруны киметә. Без кулларыбыз белән һәрчак нәрсәгә дә булса кагылабыз. Пычранган әйберләргә яки өслекләргә, ә аннары биткә (авызга, күзләргә, борынга) кагылгач, без үзебезне инфекция куркынычына этәреп, күзгә күренми торган микроорганизмнарны йоктырабыз.
Кулларны юу кискен сулыш юлы инфекциясе, грипп, коронавирус инфекциясе, стафилококк инфекциясе, А гепатиты, лямблиоз, дизентерия, гельминтлар һәм башка инфекцияләр китереп чыгаручы чирләрнең таралуын булдырмаска ярдәм итә.
Куркыныч бактерияләр кайда яшеренергә мөм­кин булуын ачыклыйбыз. Нигездә алар тырнак астында һәм тән тире­се җыерчыкларында, өстә­венә чәчләрдә яше­ренә.
Иң пычрак әйбер – ул кәрәзле телефон! Хәзерге заманда кеше смартфонны кулыннан төшерми дә диярлек. Әгәр кешеләр кулларын юып торса да, телефон барлык бактерияләрне үзендә саклый. Шуңа күрә смартфонны бактерияләргә каршы салфетка белән ­даи­ми сөртеп торырга кирәк. Йөзекләрне дә антисептик эремәгә салып шулай чистарту зарур, сәгать беләзекләрен дә антисептикта чылатылган мамык яки тукыма белән сөртергә кирәк. Акча, компьютер клавиатурасы, ишек тоткалары, домофон төймәләре, лифт, кабызгычлар да пычракны үзләренә җыючылар булып торалар.
Кулларны дөрес итеп юарга кирәк – сабынны файдаланганда, аның белән кулларыгызны кимендә 20 секунд ышкыгыз, аннары агып торган суда юып төшерегез. Кулларыгызны чиста сөлгегә (кәгазь, тукыма) сөртегез яки куллар өчен махсус киптергечтән файдаланыгыз. Әгәр юлда барганда кулларны юу мөмкинлеге юк икән, үзегез белән антисептик, йогышсызландыру нәтиҗәлелеге булган дымлы салфеткалар алыгыз. Еш юганлыктан куллар “корылана” һәм чатнап яргаклана, дип курыкмагыз. Сөрткәчтен үк крем тидерегез. Кулларны чис­та тоту бик җиңел, моны эшләргә оныту – читенрәк. Кулларны сабынлап юып алу тән тиресе өслеген­нән микроорганизмнарны 90%ка кадәр юкка чыгарырга ярдәм итә. Исегездә тотыгыз, кулларның чис­талыгы сезнең һәм сез­нең якыннарыгызның сә­ламәтлеген саклаячак!