Яңа уку елына әзер

– Гөлнара Фә­ритовна, җәйге айларда мәгариф уч­­­реждение­лә­рендә нинди эш­ләр алып ­барылды?

– Мәктәпләрне, балалар бакчаларын, өстәмә белем бирү учреждение­ләрен комплекслы әзер­ләү оештырылды, ул террорчылыкка һәм янгын куркынычсызлыгына каршы чараларны, санитария нормаларын һәм кагыйдәләрен үтәү таләпләрен ­башкаруны, ремонт эшләре үткәрүне, җылыту сезонына әзер­лекне, кирәкле җиһазлар һәм уку әсбаплары сатып алуны күз уңында тота. 

Тәтеш районында 39 белем бирү оешмасы бар: 13 урта мәк­тәп, 3 төп, 8 башлангыч, 12 мәк­тәпкәчә белем бирү учреждение­се, балаларга өстәмә белем бирү учреждениесе, мәктәпара уку комбинаты, “Акчарлак” балалар сәламәтләндерү лагере.

Барлык гомуми белем бирү һәм мәктәпкәчә белем бирү оешмаларында да косметик ремонт ясалды. Учреждениеләрне агымдагы ремонтлауга җирле бюджеттан 1 290 370, 86 сум бүлеп бирелде.

“Заманча мәктәп” федераль проектының “Мәгариф” илкүләм проекты кысаларында Урюм урта мәктәбендә “Үсеш ноктасы” гуманитар һәм цифрлы профильле мәгариф үзәге төзелде.

Бидәңге төп мәктә­бендә азык-төлек блогына, Урюм һәм Бидәң­ге мәктәпләрендә җы­лы­лык трассасына ­капиталь ремонт ясалды. Барлык мәгариф учреждениеләрендә санитар-эпидемиологик чаралар уздырылды.

– Мәгариф учреж­дениеләре кадр­лар белән тәэмин ителгәнме?

– Тәтеш районының мә­гариф учреждениеләрендә барлыгы 725 кеше эшли, шуларның 368е – педагогика хезмәткәрләре. Аларның уртача яше – 45 яшь. Мәгариф системасының педагогика хез­мәткәрләре белән тәэмин ителеше 98 процентны тәшкил итә. “Инглиз теле”, “математика”, “рус теле”, “мәктәпкәчә төркем тәрбиячесе” белгечлекләре буенча педагогика кадрларына кытлык бар.

– Укытуның имин шартлары белән тәэмин итү буенча эшләр ничегрәк тора? 

– Имин белем бирү барышын оештыру – белем бирү оешма­ларының өстенлекле юнәлеш­ләренең берсе. Районның барлык мәктәпләрендә һәм балалар бакчаларында янгын куркынычсызлыгын тәэмин итү максатыннан янгын турындагы мәгълүматларны яктырту, эшкәртү һәм тапшыру системалары урнаштырылды. Мәгариф оешмалары тарафыннан янгын гидрантларын сынау, эвакуация юлларын һәм эвакуацион чыгу юлларын җиһазлау эшләре алып барыла.

Тәтеш районының барлык мәктәпләрендә һәм балалар бакчаларында тревога сигнализациясе төймәсе урнаштырылды. Видеокүзәтү системасы белән 11 мәктәпкәчә белем бирү оешмасы, 24 гомуми белем бирү учреждениесе, өстәмә белем бирү учреждениесе җиһазландырылды. Килдеш урта мәктәбенә һәм шәһәрнең “Сабый” балалар бакчасына видеосурәтле домофон урнаштыру өчен 79 500 сум акча бүлеп бирелде.

Районның 36 мәгариф объектында зур радиуслы тревога сигнализациясе брелоклары урнаштырылды, алар бинада һәм саклана торган объектның янәшәдә­ге территорияләрендә кабынып эшләүне тәэмин итәләр. 20 белем бирү учреждениесе сөйләм­ле хәбәр­иткеч системасы бе­лән җиһаз­ландырылды. Барлык мәга­риф учреж­дениеләренең дә әйләнә­-тирәли тотып алынган коймалары бар.

Ике гомуми белем би­рү оешмасында шәхси сак предприя­тиесе тарафыннан физик сак­лау тәэмин ителә, районның 16 учреждениесендә төн­ге һәм көндезге каравылчылар эшли. 

– Мәктәп автобусларында нинди куркынычсызлык чаралары ­каралган?

– Укучыларны өз­ек­­лекләрсез база мәк­тәпләренә илтеп җиткерү максатыннан мәктәп автобуслары маршрутлары тикшерелде. Тикшерү актлары “Татавтодор”га һәм җирле үзидарә башлыкларына җибә­релде. ТР Мәгариф ми­нистрлы­гында мәктәп автобусларының пас­портларын яклау һәм ка­бул итү оештырылды. Агымдагы елның 15 августында 2025 – 2026 уку елына әзерлек буенча мәктәп автобусларына тикшерү булды. Барлыгы 16 маршрут оештырылды, 12 база мәктәбенә 32 авылдан сертификатлы 16 автобус белән 460тан күбрәк укучыны алып килү планлаштырыла. Автобуслар видеокамералар, спутник навигациясе системасы, тахографлар, яктыртучан маяклар белән җиһазландырылды.

– Әңгәмәгез өчен рәхмәт.