Кар куркыныч тудыра

Түбәләрдәге кар катламы, боз сөңгеләре тәтеш­леләрнең сәламәтлегенә һәм гомеренә, шулай ук милекнең сакланышына да куркыныч тудыра.

– Тәтеш шәһәренең төзекләндерү Кагыйдәләре нигезендә, кышкы вакытта биналарның хуҗалары (арендалаучылары) һәм торак фонд белән ида­рә итүче идарәче оешмалар түбәләрне, керү урыннарының козырекларын кардан, боз катламыннан, боз сөңгеләреннән, шулай ук кар көртләре барлыкка килүгә, туплануга карап, вакытында чистартуны оештырырга тиеш. Тышкы суүткәргечле түбәләрне артык калынлыктагы кар катламы барлыкка килмәсен өчен, кар катламының калынлыгы – 30 сантиметр, ә 0 градус һәм аннан югарырак температурада 10 сантиметрдан да биек булуга юл куймыйча, вакыт-вакыт кардан чистартырга кирәк. Җәяүлеләр йөри торган җирләрдә кар, боз катламы һәм сөңгеләр төшү куркынычы булганда түбәләрне чистарту, алар барлыкка килгән саен куркыныч участокларны, билгеләнгән нормалар нигезендә, алдан коймалап алу башкарылырга тиеш. 

Түбәләрдә, балконнарда һәм керү юлларының козырекларында кар көртләре барлыкка килмәвен күзәтеп тору зарур. Шунысын билгеләп үтәргә кирәк, ТР административ хокук бозулар Кодексының 3.6нчы маддәсе югарыда күрсәтелгән кагыйдәләрне бозган өчен административ җаваплылыкны күз уңында тота.

Санкция сыйфатында гражданнарга – 2 меңнән 3 мең 500 сумга кадәр, вазифаи затларга – 15 меңнән 30 мең сумга кадәр, юридик затларга 200 меңнән 500 мең сумга кадәр административ штраф салу каралган, – дип хәбәр итә Тәтеш районы башкарма комитетының админис­тратив комиссиясе. 

Тәтештә күпфатирлы йортларның түбәләрен чистарту буенча планлы эш алып барыла, әмма халыкка куркынычсызлык кагыйдәләрен үтәү бик мөһим. Бина диварларыннан ераграк торырга, кар асылынып торган түбәләр астына машиналар куярга ярамый, чистарту эшләре алып барыла торган коймалап алынган участокларга кермәскә кирәк. Җәяүлеләргә аеруча уяу булу зарур: урам буйлап йөргәндә колакчыннарда музыка тыңламау киңәш ителә – бу кар яисә боз төшкән тавышны вакытында ишетергә мөмкинлек бирми. Административ биналар һәм хосусый йортлар хуҗаларына җаваплылык күрсәтү мөһим: кар җыелуга юл куймаска, түбәләрне чис­тартканда, табигый җылылык изоляциясен саклау өчен, бераз кар катламы калдыру зарур. Су агу чокырларын һәм җилләткеч торбалар тирәсендәге урыннарны чистарту турында онытмаска кирәк. Карны имин чистарту өчен түбәгә менү зарурилыгын булдырмый торган телескопик тоткалы махсус кырып чистарткычлар кулланырга киңәш ителә. Һәм тагын бер мөһим кагыйдә – түбәләрне чистарту эшләре беркайчан да ялгыз гына башкарылмаска, көтелмәгән вәзгыять очрагында һәрчак ярдәм күрсәтә алырлык кеше булырга тиеш.

фото яи ярдәмендә барлыкка китерелгән