Актив озын гомер гадәти яшәеш кебек

Шул еллар эчендә оешма зур уңышларга иреште һәм өлкән буынны берләштергән иң зур җәмәгать структураларының берсенә әверелде.

Без ТР буенча Россия пенсионерлар берлегенең Тәтеш бүлеге эшчәнлеге турында аның рәисе Нина Новикова белән әңгәмә ­кордык.

– Нина Валентиновна,  бүлек эшчәнлегенең төп максаты нинди булуы хакында сөйләгезче.

– Безнең эшнең максаты 2030 елга кадәр өлкән буын гражданнар мәнфәгатьләрендә гамәлләр стратегиясенә һәм “Актив озын гомер” республика программасына тулысынча туры килә. Бу – өлкән яшьтәге кешеләрнең гомер озынлыгын һәм яшәеш сыйфатын яхшырту, шулай ук аларның актив озын гомер чорын озайту.

– Җирле бүлектә ничә кеше бар һәм ул районда нинди әһәмияткә ия?

– Бүгенге көндә безнең бүлектә 1 709 кеше исәпләнә – бу райондагы картлык буенча пенсия алучы­ларның якынча 29 проценты. Гомумән алганда, өлкән яшьтәге кешеләр халыкның өчтән бер өлешен тәшкил итә. Шуңа күрә безнең эшчәнлек зур социаль әһәмияткә ия һәм яшәеш сыйфатын яхшыртуга юнәлтелгән.

– Сез үз хезмәтегездә кайсы юнәлешләргә игътибар бирәсез?

– Без берничә төп юнәлеш буенча комплекслы эш алып барабыз – бу белем бирү, мәдәни-ял, физкультура-сәламәтләндерү, компьютер, финанс һәм хокукый белемлелекне үстерү, волонтерлык, социаль туризм, шулай ук гаилә кыйммәтләрен ныгыту.

– Актив озын гомер концепциясе гамәлдә ничек тормышка ­ашырыла?

–  Өченче яшь университеты иң мөһимнәрнең берсе булып тора. Бездә төрле юнәлешләр: мәдәният һәм мәгърифәт, психология, туган як тарихы, компьютер һәм финанс грамоталылыгы, дин, сәламәт яшәү рәвеше, шәҗәрә төзү, вокал-хор буенча факультетлар эшли. Моннан тыш, дәресләрнең бер өлеше авыл җирлекләрендә дә үткәрелә. 

– Белем бирү программалары ни дәрәҗәдәге ихтыяҗга ия?

– Бик зур ихтыяҗ белән кулланыла. Бигрәк тә компьютер һәм финанс белемлелеге. Безнең катнашучылар “Буыннар бәйләнеше”, “Хикмәт”, “Интернетка рәхмәт” кебек конкурсларда һәм олимпиадаларда даими катнашалар һәм призлы урыннар яулыйлар.

– Сез нинди проектлар һәм инициативаларны гамәлгә ашырасыз?

– Озак вакытлы муниципаль проектлар арасында “Пушкинга юл әкияттән башлана” проекты һәм чәчәк үстерү, төзекләндерү буенча конкурс бар. Шулай ук без өлкән кешеләрнең активлыгын үстерүгә юнәлтелгән биш үз тәҗрибәбезне гамәлгә керттек. 

– Мәдәни инициативалар ­турында сөйләгезче.

– Мәдәният – ул актив озын гомернең иң мөһим өлешләренең берсе. Бездә кызыклы программалар бар, мәсәлән, “Көмеш гасырның алтын җепләре” һәм “Бөек музалар”. Без “Поэтик кәеф” дип исемләнгән әдәби кафе булдырдык, анда очрашулар, шигырьләр уку, сәхнәләштерелгән әсәрләр кую, музыкаль чыгышлар үткәрелә. Шулай ук “Эрудит” ­интеллектуаль клубы эшли.

– Сез гаилә кыйммәтләрен дә үстерәсез. Бу эшнең асылы нәрсәдә?

– Без күп буынлы гаиләне ныгытуга юнәлтелгән тәҗри­бә­не гамәлгә ­ашырабыз. “Буыннар бәйләнеше – мәңге­лек кыйммәтләр” дигән фотокүргәз­мәләр үткәрәбез, анда гаилә династияләре, традицияләр һәм тарихлар тәкъдим ителә. Бу өлкән буынга карата хөрмәтне һәм үз гаиләсе өчен горурлык хисен ныгытырга ярдәм итә.

– Сез спортка да зур игътибар бүлеп бирәсез. Катнашучылар өчен нинди мөмкинлекләр бар?

– Әйе, физик активлык – безнең эшнең мөһим өлеше. Бездә сәламәт яшәү рәвеше төркемнәре, теннис, шахмат, җиңел атлетика буенча спорт секцияләре эшли. Дәресләр шул исәптән шәһәрнең спорт-сәламәтләндерү комплексында да ташламалы шартларда уза. Без район һәм республика ярышларында, спартакиадаларда актив катнашабыз һәм еш кына призлы урыннар яулыйбыз.

– Сез эшегезнең нәтиҗәләрен ­ничек бәялисез?

– Без өлкән кешеләрнең активрак, җәлеп ителгәнрәк, яңалыкка ачыктан-ачык булуын күрәбез. Өлкән буын белән аралашу үзәгенең уртак эше безгә яңа дәрәҗәгә чыгарга – үз эшчәнлегебезне тагын да нәтиҗәлерәк итеп тормышка ­ашырырга мөмкинлек бирә. Безнең оешма тарафыннан шактый юл үтелде. Җирле бүлек активистлары ярдәмендә без зур уңышларга ирештек. Алга таба да хезмәттәшләрнең көч-куәте һәм иҗади эшчәнлеге яңа үрләр яу­ларга булышлык итсен. 

Безнең теләк – актив озын гомер һәркем өчен тормышның гадәти өлешенә әверелсен.

фото: tetushi.tatarstan.ru