Шикәр комын спиртлы эчемлеккә алыштырган

(Тәтеш, 27 октябрь, “Тәтеш таңнары”).

Урюм авылында мөгезле эре терлекләр асрау өчен ферма бар һәм анда кечерәк ашханә урнашкан иде. Шунда эшләүче повар капчыктан шикәр комы югалуын сизеп алган. Өстәвенә аз-азлап, әйтерсең лә кемдер 2-3шәр кило урлагандай тоелган. Җимереп кергән эзләр булмаган, ишектә сан белән җыеп ачылучы йозак эленеп торган, аның кодын фәкать повар гына белгән. Өч кешедән торган каравылчылар бер нәрсә дә аңлатып бирә алмаганнар: бернәрсә дә күрмәгәннәр, үзләренекеләрдән башка төнлә белән беркем дә килмәгән. Повар ике каравылчы торганда урлау гамәле булуына игътибар иткән, ә өченчесендә – барысы да әйбәт булган. Беренчеләре, шелтә алганнар, ә икенчесен уяу хезмәткәр буларак билгеләп үткәннәр.    

Тик менә шундый хәл килеп чыккан. Авылдагы бер әби әлеге уяу хезмәткәрнең  аның күршесенә килүе һәм шикәр комына көмешкә алыштырып бирүен үтенгәнлеге хакында имеш-мимешләр тараткан. Учас­ток инспекторы һәм җинаятьчеләрне эзләү оперуполномоченные әлеге хәбәрне игътибарга алганнар. Оператив чаралар нәтиҗәсендә, әлеге “уяу” каравылчының үзенең хезмәттәшләре янына карта уйнарга кереп йөргәнлеге ачыкланган. Аннары ул үзе, алар объектларга тәртипне карарга чыгып киткәч, санлы йозакны ачып, пакетка шикәр комын кружка белән салуын, йозакны шул ук код белән бикләвен әйткән. Карак урланган шикәр комын җыеп, аны спиртлы эчемлеккә алыштырган. Беркем дә ул урлаган дип уйлап та карамаган, чөнки ул – уяу каравылчы булып саналган, аның сменасында беркем дә урламаган бит.
Хәйләкәр каравылчының нинди икәнлеге беленде, ул тиешле җәзасын алды.