Тәтеш үсемлекчеләре – янә республикада алдынгы

 (Тәтеш, 19 декабрь, “Тәтеш таңнары”). Тәтеш ­районында 2020 елда 5778 ­гектар мәй­дандагы татлы тамыразык­ны тулаем җыю 286,011 мең тонна тәшкил итте. Тәтешлеләр шикәр чөген­дере уңдырыш­лылыгы буенча республикада беренче урынны били, тулаем җыю буенча – иң яхшылар исәбендә. Хәзерге вакытта шикәр чөгендерен шикәр заводларына ташу бара. 

Игеннәрне урып-җыюда да үсемлекчеләрнең белемле итеп эшләве үзенең саллы җимешләрен китерде. Игеннәрне тулаем җыю, бөртеккә кукурузны исәпкә алып, 206,488 мең тонна тәшкил итте, уртача уңдырышлылык – гектардан 46,5 центнер (респуб­лика буенча – 35,9).

Шулай итеп, Тәтеш рай­оны соңгы еллардагы кебек үк иген уңды­рышлылыгы буенча Татарстан Республикасында иң югары нәтиҗәләр күрсәтеп, икенче ­урын­ны алып тора. ­“Колос”, Сод­ружество”, “Бакырчы”, “Р. Г. Сафиуллова”, “Нур” хуҗалыклары Тәтеш ик­мәгенә иң күп өлеш керт­теләр. 

“Уңдырышлылык буенча республика күләмендә зур уңышларга ирешү игенчеләрнең тырыш хез­мәте, белемле эш итүе, кырларда заманча техникалар һәм алдынгы тех­нологияләрне куллануы ярдәмендә мөмкин булды. Дәүләтнең һәрдаим булышлык итүе уңышның мөһим өлеше булып тора, аның ярдәмендә районның машина-трактор парклары яңартыла, авыл хуҗалыгы объектлары төзелә һәм капиталь ремонтлана, шәхси ярдәмче хуҗалыклар һәм КФХлар өчен төрле программалар тормышка ашырыла. Безнең район башлыгы Рәмис Сафиулловның зирәк һәм алдан күрүчән күрсәтмәләре ярдәмендә киләчәккә алгарышлы хәрәкәт белән барыла, яңа югарылыкларга ирешелә”, – диде район гәҗите хә­бәрчесенә районның авыл хуҗалыгы һәм азык-төлек идарәсе  начальнигы Ирек Садриев.