Исерек хәлдә машина йөртү суд эскәмиясенә китергән

Бу сәяхәт җинаять җаваплылыгына тарту белән генә түгел, ә машинасын дәүләт файдасына бөтенләйгә конфискацияләү белән тәмамланган.

Тәтеш районы прокуратурасы хезмәткәрләре хәбәр итүенчә, 2026 елның 27 гыйнварында хатын-кыз, алдагы көнне спиртлы эчемлекләр кулланып, иртә белән үз машинасында эш буенча каядыр барырга булган. Ләкин ул ерак китә алмаган, кузгалып китеп ун минут узгач, җиңел машинаны дәүләт автоинспекторы туктаткан, ул шунда ук хатын-кызда исереклек билгеләрен күргән. Шул урында алкотектор ярдәмендә үткәрелгән медицина тикшерүе нәтиҗәләре шикләнүне дәлилләгән: прибор сулаган һавада бер литр алкогольгә 0,325 миллиграмм теркәгән. Автомобиль шунда ук йөртүдән алынган һәм махсус машина кую урынына озатылган.

Мәгълүмат базалары буенча тикшерү барышында ачыкланганча, кагыйдә бозучы мондый гамәлне беренче тапкыр гына эшләмәгән. Ул исерек хәлдә машина йөрткән өчен 2023 елның җәендә җәмәгать судьясы тарафыннан административ җаваплылыкка тартылган булган инде. Бу вакытта хатын-кызга 30 000 сум күләмендә штраф билгеләнгән һәм ул ел ярымга машина йөртү хокукыннан мәхрүм ителгән булган.

– Хатын-кыз штрафын түләгән, әмма үзе өчен тиешле нәтиҗәне ясамаган. Гыйнвардагы сәяхәт вакытына административ җәзаның закон белән билгеләнгән вакыты узмаган булганлыктан, кабат кагыйдә бозу автомат рәвештә РФ җинаять Кодексының 264.1нче маддәсенең 1нче өлеше буенча җинаять эше булып тора. Суд утырышы барышында гаепләнүче үз гаебен тулысынча таныды һәм кылган гамәленә үкенде. Җәзаны билгеләгәндә, суд җиңеләйтүче берничә шартны, шул исәптән балигълык яшенә җитмәгән балалары булуын һәм яшәү урыныннан канәгатьләнерлек характеристикаларны исәпкә алды. Суд автоледига 200 сәгать мәҗбүри эш, теләсә нинди транспортны йөртү эшчәнлеге белән шөгыльләнү хокукыннан ике елга мәхрүм итү җәзасы билгеләде, шулай ук гаепләнүченең шәхси автомобиле дәүләт милкенә түләүсез рәвештә конфискацияләнде, – дип хәбәр итә прокуратура хезмәткәрләре.

фото ясалма интеллект ярдәмендә ясалган